من طبعهن من سجاياهن ومبداهن

تحطيم الآمال بين ايدين مغليهن

لو تحسن الظن في خافي نواياهن

سمر الدواهي تخفيهن.. سواهيهن

لو تعمل المستحيل لتكسب ارضاهن

لا تحسبنك بما سويت ترضيهن

يا للي تعجبت من ظاهر.. سواياهن

من شان ترضى ياليت تشوف خافيهن

لو تنشد ادنى الجروح وتنشد أقصاهن

لقيتهن منهن.. أولهن وتاليهن

تدرون منهن؟ هن اللي قلت بأغلاهن

اعذب بيوت تسامرني.. معانيهن

هي درة الغيد بعيوني.. هي أحلاهن

هي تاج حاضرهن الغالي وماضيهن

عشقي لها اعيد فيه العهد واراهن

على انها الباقيه والغيد ما أبيهن