الهم يا مقبول زود نكدنا
ما بين يوم وليل يرسل جروده
أليا ضحكنا اسبوع قام وهجدنا
وشال الليال البيض وأوجه بسوده
بيض الليالي ما صفت مع حمدنا
حمد خيار البيت ثالث عموده
اختاره المولى ونقص عددنا
أمر مقدر والليال معدوده
لو اجتمعنا وش يسوّي جهدنا
ما ينفع المخلوق كثرة جهوده
سنّتك يا من له ولأجله سجدنا
يرضى بها المسلم ويكمل سجوده
لك الدعاء منا يا من فقدنا
يالله عسى الجنة تبرّد لحوده
هذي استطاعتنا وهذا عهدنا
يالله على السراط تثبت وجوده
رجلٍ نعرفه بين الأقصى والأدنا
بالطيب والعفة تقادح زنوده
فيه الكرامة والشهامة وجدنا
من شبته طيبه يزود ويزوده
وبعده طحا طيح الرجال وسندنا
أبناه واخوانه عهدهم عهوده
هم العوض والله يعوض كبدنا
ولا فيه واحد سالم من لهوده
وختامها يالله لوجهك عبدنا
رحمتك يا محيي العظام الهموده
