بين السهر والحلم تاخذك رجوى

وتعانق بليل انتظارك همومه

لا طلت حلمٍ تنشده دون جدوى

ولا هو كفاك الليل غيرة نجومه

فوق احتمالك من عنا البعد تقوى

معذور طرفٍ يبتعد عنك نومه

من يوم ضاع الوصل بعيون تهوى

والخافق اللي فيك ضاعت علومه

ما كل شي جاك بالهم يسوى

حزن المشاعر فيك وش هو لزومه

عطني بقايا الياس واعطيك سلوى

عن مستحيلٍ كان ودك ترومه

ما ارضى لعينك تسهر العمر شكوى

وتهل حزن فيك لاحت غيومه

بعض الاماني ما تجي عقب رجوى

وليل سهرته ما تجي لك حلومه