| تراث الجزيرة
ولي حمامة كل ما جا ضحى السبت
ناحت بصوتٍ يفجع الغافليني
مصيوبةٍ من حر مابه وأنا انصبت
باحت كنينه واستجرت كنيني
بالله يالورقا كفاية تعذبت
أرجوك يكفي بس لا تذبحيني
ماطبت من جرح أكحل الطرف ماطبت
لازلت أعاني لوعة العاشقيني
يا صاحبي مادام عن شخصك أعربت
دوك الحقيقة كلها يا ظنيني
الوقت غربني أو أنك تسببت
يا صاحبي خله مابينك وبيني
ما هو طرب بعدي على بعدي اغصبت
مدري سجين أو زاد مثل السجيني
ولو غبت عن عينك أنا معك ماغبت
ولو غبت عن عيني تراك وسط عيني
يالغالية حبك بقلبي نبت نبت
«يا وزنة» الدنيا فلا لك وزيني
ماتبت عن حبك بعمياي ما تبت
لو انت شمّت المخاليق فيني
ناصر راضي الغريّب - عرعر
|
|
|
|
|
