بديت باسم منزل الكتب تنزيل
باسم الاله وكلنا نستعينه
منزل التوراة من قبل الانجيل
ومنزل القرآن بسور مبينه
رب كريم يعطي الرزق ويزيل
وياسعد من هو كان ربه عوينه
عاداتنا ترحيبنا بالمقابيل
لو هم بتالي الليل مهنا ضعينه
اكرامنا للضيف عاده وتبجيل
واكرامنا للضيف عاده حسينه
هو كيف ما نرحب بهيل المعاميل
ليا صار بالمجلس لك الله يزينه
أهلاً هلا بك يا وزير الرجاجيل
يا اللي مع الشدات يضحك جبينه
اهلا هلا بك جعل دربك تساهيل
ومن سار في دربك عسى الله يعينه
اقبل سحاب الخير ومعه الهماليل
برقه صدوق ومعشبات سنينه
وصل سحاب الخير وفي مقدمه سيل
واللي غشاه السيل يخضر بطينه
سهولنا وجبالنا والمقابيل
استبشرت ومن قبل كانت حزينه
من الطبيق اليوم لغنيم وحقيل
وحتى شعيب الحمض بديرة جهينه
من الفرح لبست عقود وخلاخيل
والله عطاها الزين من غير زينه
حب الوطن عذري ومن الغير مانيل
بقلوبنا والله مهنا وزينه
يا سيدي والله من غير تفضيل
انت الوفا ومنك الوفا عارفينه
انت دليل اللي غدا كنك سهيل
ينسى التعب ويعود لقلبه يقينه
وانتم لظلام الجهل مثل القناديل
شوفوا المعاهد بالقرى والمدينه
يا موحدين الدار وأنتم على الخيل
بقيادة اللى صان عرضه ودينه
حتى غدت مركز حضاره وتأهيل
الشعب آمن والمنافذ حصينه
ويا مجنبين الشعب كثر الغرابيل
بالراي والحكمه وفتح الخزينه
ماهمكم كثر المقالات والقيل
ولا انتم من اللي له مقاصد دفينه
مساركم بالدرب مابه تحاويل
لامن يسار الدرب ولامن يمينه
نمشي با مان الله معكم على مهيل
الجو صافي والمراكب مكينه
الجو صافي والمراكب مظاليل
ياحظنا في قايدين السفينة
يوم ان اذان الناس رقص ومواويل
اذانكم وسط الحرم والمدينة
يقرا كتاب الله برهبه وترتيل
متجودين بالحبال المتينه
وخمس الفروض بوقتها والتهاليل
النهج واضح والقيادة امينه
من ضاع دينه ماتفيد الاساطيل
وبني بلا سيسان ياقع بحينه
دون الوطن والدين تضيع الاقاويل
ومن يرخص الاثنين الله يهينه
هذا كلام الصدق من غير تضليل
ومشي الشرف بالرجل اكبر قرينه
واللي بقى من الجسم والعظم والحيل
عند اللوازم بامركم محتسينه
يا اللي حميت البيت في طير ابابيل
من ابرهه والفيل ومرافقينه
تحفظ لنا تاج الوطن مربي الجيل
اللي حياته عند شعبه ثمينه
وتحفظ عضيده مكمل البني تكميل
اللي لياقيل الخلل قال وينه
وركز جهوده وحلل الامر تحليل
وليان الهزيله لاحقه بالسمينه
وتحفظ لنا اللي ليا لفى كنه النيل
ابن الكرام اللي عيوني بعينه
مصر لها نيل وحنا لنا نيل
يانيل يانيل السعد والسكينه
يا ناصر اللي جاري له بهاذيل
قضيت حاجاته وسديت دينه
الله يزيدك خير يا وافي الكيل
والله يزيدك من فضايل ايدينه
حيثك يجيك الخير وانته لنا تكيل
حنا نشوف وغيرنا شايفينه
يعزكم مولاي بالحيل بالحيل
أهل العقيدة محتمين الضعينه
ويهيي بطانه خير ما تعرف الميل
أصحاب راي وبالمواقف فطينه
أسرة كريمه لاتخادع ولا تعيل
وعمر المواطن ماشعر بالغبينه
شجره عظيمه تعطي الظل وتقيل
وايضاً ثمرها للفقارى خزينه
يعزكم مولاي بالحيل بالحيل
أهل العقيدة محتمين الضغينه
