احترت مدري موقعي وين ابلقاه
في ها الزمان اللي كثارٍ.. بلاويه
نوب اتعجب من زماني.. وممشاه
ونوبٍ اقول ان السنع في مماشيه!!
هذا الزمان اللي تغير من اقصاه
وكلٍ على ركبه يدرج.. مواطيه
احدٍ قبل به كره شينه.. وحسناه
يمشي مع الموضه على شان يرضيه
واحدٍ على ركبه ركب فوق علباه
كنك تشوفه ماسكه مع علابيه
يلبس ملابس)جنز( والثوب خلاه
والراس فوقه )قبعه( من يناحيه
كنه صنع صاروخ والكون عداه
وان جيت ترجي منه كلمه تهديه
كنك اليا ناظرت صوبه تحداه
والا تضيع صنعته يوم ترجيه
ركب تقاليد الخواجه.. ومسعاه
مير الخواجه يفتخر في مساعيه!!
له صنعةٍ يفخر بها بين من جاه
والا الديانه هابطه في حراويه
مير اطلبك يا وال الافراج ترفاه
هذا المقلد يوم ضيع مباديه
وتعيد سلمٍ ضاع منا فقدناه
سلم الأهل واجدادنا من يحاليه
