يا الله تغفر والذنوب تحلها
يا الواحد القهار ياالفرد الصمد
تغفر ذنوبي دقها مع جلها
يا رافعٍ سبع طباق بلا عمد
دنيا الفنا لازم تشح بظلها
ما من وراها إلا الشقاوة والنكد
يالآدمي خمس الفرايض صلها
ود الزكاة وحج وابشر بالسعد
ايام شهر الصوم صمها كلها
ملزوم من صام الشهر يحصي العدد
واد الفرايض كلها في حلها
لعل تكتب لك اليا قبلت سند
حتى شياطينك تموت بغلها
بعناقها يقرن سلاسل من صفد
واهل النميمة يالبيب افطلها
كم من مشاكل ولدوها فالبلد
ومن يعتصم بالله يلقى حلها
ويحلها المعبود حلال العقد
عشرة هل التوحيد محد ايملها
واللي بذر حبه تحت ربه حصد
يا اخ العرب كل الدروب ادلها
واليا صلح قلبك سلمت من الحسد
نفسك يميز طيبها من ذلها
بالعزم والتوحيد رابط واجتهد
ومن شال حمله لازم يركلها
والدين امانة وانت تحملها بعد
كانك من اهل المعرفة كفولها
صنت الأمانة وانت صادق بالعهد
ويارب تغفر والذنوب اتحلها
يا الواحد القهار ياالفرد الصمد
