يوم الخميس اللي مضى بالجزيرة
علم قريته اسهر العين وابكان
دنيا ولو طالت تراها قصيره
غير الولي كل الذي فوقها فان
العمر ما ينباع في كل ديره
العمر حدَّده الولي ماله اثمان
عمرك شراعك والعواصف خطيره
يا سرع ما يطوي ولو طوّل وزان
عد الليالي والليالي كثيره
عد الحمام اللي وقع فوق الاغصان
عد النجوم اللي سماها تنيره
واعداد ما رفرف بها الكون جنحان
يرحمك ربي يا فقيد العشيره
يا نسل من للطيب والجود عنوان
فهد فهد بالطيب من هو خشيره
نسل الملوك اللي بنوا ساس واركان
كل الشهامه فيك مع طيب سيره
شي ورثته من خوالك وعمان
مرحوم ياللي وافي بالمسيره
نسل الوفا والمجد يا نسل سلمان
ابو فهد سلمان ربي يجيره
عسى البقا براسه على مر الازمان
معذور من يبكي دموعه غزيره
من مات له مثلك بلاشك حزنان
أواه قلته من خفوق يضيره
موتك وموتك جاب لي هم واحزان
ماهو جزع والكون ربي يديره
راضي بحكم الله ولا نيب زعلان
يالله يا علام ما بالسريره
يا عالم باللي خفى والذي بان
يا سامع نجوى الجموع الغفيره
يا عالم باللي يجي والذي كان
تسكن فهد باللي نعمها وفيره
في جنة الفردوس يا عالي الشان
واختامها هذي مصيبه كبيره
يالله تلهمنا مع الصبر سلوان
