يا نجد أنا اشهد راح منك فقيده
ولا والله اللي حط بالقبر رجال
ذاك الامير اللي علومه حميده
راع الكرم والجود حمّال الاثقال
له فزعة تفرح عجوز وحيده
اللي عليها الهم وقّف ولامال
وله فزعة تمسح دموع عديدة
ويرسم علامات الفرح عند الاطفال
وكم واحد مرضان ينبض وريده
بزيارته يمه ونّس له البال
وكم واحد مربوط وافتك قيده
وخلاه من عقب السجن داله البال
راح الامير وباقي ذكر صيده
صاد المراجل والمثايل والافعال
راح الامير وجعلها في رصيده
افعاله البيضاء على مر الاجيال
رحل امير العز راح الوليده
والكل يبكونه على كل الاحوال
ويبكيه منهو ذايق مد ايده
ذاق الرجا والخير من عقب الامحال
ويبكيه منهو خايف من ضديده
من عقب ما راح السند يشكي الحال
من مدرسة سلمان كوّن رصيده
واصبح بفضل الله يضرب به امثال
وهذا واعزا سيدي في عضيده
ويجبر عزا من هو للاثقال حمال
ويالله يالمعبود والي عبيده
في جنة الفردوس تطيب له الفال
وصلات ربي عد النجوم العديده
على رسول الله وافي الافعال
