البارحة فكري تخالف طواريه
قامت تخالف لين بيّح خفاياه
والدمع من عيني على الخد مرخيه
مثل السحاب اللي تحدّر من أقصاه
من يوم جانا علم لاعاد طاريه
من هاتفٍ يا ليتنا ما سمعناه
خبر وفاة اللي نوده ونغليه
فراج ليت الموت يا ناس ماجاه
فراج زبن اللي زمانه معاديه
من ضاق به كونه ودنياه ينصاه
بلسم كبودٍ للجماعة واهاليه
وعلى العدو نارٍ على القلب تصلاه
مادمت أنا حيٍ فلا نيب ناسيه
يا كيف ابنسى اخوي يا كيف أبنساه
ولو البكا بيرد من مات لا ابكيه
لا ابكيه دمع ودم لو طال مبكاه
لكن عسى المولى من النار ينجيه
وبين الرسل والانبياء يرفع بناه
وقبره من الجنة ياربي تحليه
وتجعل جنان الخلد يارب مأواه
وتطهره من كل ذنبٍ وقع فيه
وتسقيه من نهر الجنان المصفاه
ويجبر عزانا واحدٍ دوم نرجيه
ربٍ يصبرنا على حر فرقاه
