قالو علامك تقاطعنا وش العله

قلت السبب تعرفونه وانتم ادرى به

بعض المجالس تهين الرجل وتذله

والقيل والقال ما حبه ولا ارضا به

أخاف من عادل ما يقبل الزله

في موقف كل واحد ينظر كتابه

لا خير في مجلسٍ ما فيه ذكر الله

ولا يقول الرسول وقالت اصحابه

ولا سوالف رجالٍ تعرف المله

ما تلحق الناس والغايب تهزا به

تلقا ليا جيت غير العود والدله

هرج يسليك ما يزعجك من جابه

هرج النشاما القديم وفعلهم كله

اللي جرى في زمانٍ فات وأسبابه

أخير من مجلسٍ لا رحت عانٍ له

ما فيه ما يشرح الخاطر توحابه

يا كود يا فلان هاته وده وخله

السالفه نفسها والذوق متشابه

ما تسمع اللي يسولف لك من الشله

تقول داخل حراج هواش وطلابه

ناسٍ صواميلها بالسرد منحله

بأعراض الأجواد مثل مغلث الغابه

أهل البخت للأسف في هالزمن قله

تسيّد المجتمع من ضيع ادابه