يا الله يلي كل عقد تحله
اللي مشى برضاك ما كان خايب
ومن بعدها خط القلم بالسجله
بابيات شعر مثل در الحلايب
وصل سلامي لابو ماجد وقله
الله يجيره من جميع المصايب
نرفع له البيضا براس المطله
عقب الرجال مهونين الصعايب
وتحية تنشر بصحف المجله
وترسل شذاها مع نسيم الهبايب
الى جيت دايم والكرام بمحله
وعادات ابو ماجد يفك النشايب
مقلط للضيف بنٍ بدله
وكبش سمين من خيار الجلايب
في مجلسا كل الدهر ما تمله
سموت الرجال والسوالف غرايب
والجار دايم عندهم كهلله
وينصاه من صارت عليه المصايب
والصبر والمعروف دايم هلٍ له
شمر هل النخوات عز الصحايب
افعالهم مثل الجبال المظله
اهل المروة متعبين النجايب
وعاداتهم الى جن مثل الاهله
من فعلهم تحنا رقاب الركايب
وان غاب واحد صار واحد محله
طيبٍ مقسم بين شبٍ وشايب
وان كان يسكن بر ولا بفله
الطيب من بين النشامى وهايب
وابوه وجده كلٍ السيف سله
واهل مغاويرٍ وشلف وحرايب
وريفٍ لمن حاشت يديه بمحله
وطيبه يعم الاصدقاء والقرايب
والقاف يزهى في مديحه ودله
اللي على المعروف جر السبايب
والله ما نسى فزعته وموقفٍ له
مدام ما حطت علي النصايب
وارجو السماحة كان بالقاف زله
واقبل تحياتي بلطف ولبايب
وصلاة ربي عد خط السجله
واعداد ما هلت حقوق السحايب
على رسولا اتبع خير مله
وقاه ربه شر حر اللهايب