حايل بلادي درت ما شفت حلياه
حبه ابقلبي ما لغيره مجالي
إلا المدينة والمطاف وعرفاه
اللي امشرفها عزيز الجلالي
وشمر هلي أهل الكرم والمرواه
كسابة الطولات أول وتالي
نطاحة العدوان يوم المثاراه
لا ثار عج الخيل مثل الجبالي
وسلطان ابن صقر الجزيرة حظرناه
فرز الوغى ما بين جد وخالي
من صفوة آل سعود اهل المهماه
فريس نجد اللي مشوا بالعدالي
اهل السيوف اللي على الراس جسراه
اهل الرماح اللي تدك العوالي
وفيهم ظهر سلطان نعم القراباه
غريب طبعه بين كل الرجالي
حير هل الافكار واهل الشهاداه
وشهد له اصحاب السمو والمعالي
وعز الله انه رابح من ترجاه
زبن الجلاويّه بعيد المدالي
ويا طير يا للي بالهواء لا تعداه
اهبط عل بيته وخلك اموالي
مع الطيور اللي تغرد بقصراه
تبيت في قربه امن الهم خالي
في جيرت اللي تبذل الجود يمناه
ريف الضيوف الوافدة والاهالي
ويا هل الركايب لا لقيتو مطاياه
وجيتوا حلال الشيخ باقصى المفالي
عشوا جواره لا تعدوا رعاياه
قربه مثل غيث السماء للحلال
واوصي رجال الدين والعلم تنصاه
اللي امفضلهم عزيز الجلالي
سلطان معكم في لسانه ويمناه
وعمره لدينه يدفعه ما يبالي
لا قالوا الاسلام كثرة رزاياه
يقبل ابو خالد بحال ومالي
يقول انا سلطان راعيه وحماه
والحفظ كله عند محصى الرمالي
وستر العذارى لا حضرن المثاراه
وعز الشيوخ اللي تدور المعالي
يدلي كما حرّ ببانات مرباه
ويجدع بعيد الصيد قبل الموالي
عوق الظواري تنثر الريش يمناه
وليا عرض له صيدة ما يبالي
وسلطان والله ما تسوى سواياه
ومن قال انا مثله ايشهد رجالي
ما هو مثل سلطان لا هو ولا اياه
منزل ابو خالد عسير المنالي
واللي تشبه با بو خالد وممشاه
لو قال قوله يختلف بالفعالي
عشرين مع عشرين كله حسبناه
تشرف على جيش يدك العوالي
امضيتهن بأم الوزارات ترعاه
اشرف عمل فيها حصون الرجالي
لها الشرف يا شيخ مثلك تولاه
هي الوزارة وانت راع المعالي
وابو اليتامى بالدهر لا عدمناه
وابو الارامل بالسنين الخوالي
وابو الذي ياقف على البير برشاه
يدلي ولا كنه قصير الحبالي
وابو الذي بالسجن كثرت بلاياه
في كربته دارت عليه اليالي
وابو المريض اللي تعذر امداواه
ينقل على حسابك على كل حالي
وفيك العزى باصحابنا والقراباه
وانت العوض بعيالنا والحلالي
وعوض ابوي اللي بحايل دفناه
اللي خذى روحه عزيز الجلالي
عليه دمعي كل ما حل طرياه
يجري ورب البيت يلطف بحالي
لا شفت ابو خالد سليت ونسيناه
هو الرجاء باللي فقد كم غالي
عسى الذي سواه واحسن سواياه
يكفيه من لوعات بعض اليالي
ويجزيه من يجزي عبيده بحسناه
ويحميه من يعلم خفي الحوالي
