عليك يا لله حيلتي واعتمادي
اليوم ذا جتني مصيبه جديده
الرّب منه الصبر ومنه السدادي
والرحمة اللي منه تشمل عبيده
بين الجماد أول وثاني الجمادي
راح الرفيق وجات ساعة وعيده
الدار لو تلبس ثياب الحدادي
للدار حق عقب ذاك الفقيده
كن النهار معتّمٍ بالسوادي
والكبد عندي كن فيها وقيده
فجيعةٍ عندي بموت البجادي
محمد قوي العزم ذاك الوليده
عزاي لاخوانه عزاً غير عادي
ولأوشيقر وذيك الديار البعيده
اخوانه أهل الخير بيض الأيادي
ياما سمعنا بفضلهم من يشيده
وعبدالعزيز وله عزاً من فوادي
وفيه العوض فيه الطبع الحميده
ولاخوانه أسوق العزا من ودادي
ومن له قريب ومن محبٍ يريده
ولأهل السويدي كلهم بالعدادي
وللي عرفوا ذيك اليدين الجويده
والصبر طبع أهل العقل والرشادي
وانتم من أصحاب العقول الرشيده
والموت حق وكلنا للنفادي
ومن تم عمره ما لقى من يزيده
ولو ينفدى جيناه والله نفادي
باللي يريد وكل شيٍ يفيده
ويالله على قبره ترش الغوادي
بعد الروايح كل يومٍ تعيده
ويالله إلى جا البعث يوم التنادي
تجعل حظوظه عالياتٍ سعيده
من حبكم ما قلت غير الوكادي
ومن حب ذاك اللي سبقنا شديده
وما قلت كل اللي يريده مرادي
حال البكا من دون قولٍ أريده
وعليك يالله حيلتي واعتمادي
اليوم ذا جتني مصيبه جديده
