بسم رب الكون والعرش وجلاله
العزيز المقتدر في كل حالا
واحد ماله شبيه في كماله
المعين اللي عليه الاتكالا
ابتدي بالقول واخذ من جزاله
واترفع عن معانيه الهزالا
يوم فكري حرك الواجب خياله
يا وطن يوم الوطن رمز ومثالا
له علينا طاعته في كل حاله
وان دعانا واجبه جينا عجالا
الوطن غالي علينا يا عياله
لو يروح العمر من دونه نضالا
الله اللي طهر أرضه بالرسالة
شرفه بالبيت والكعبة تعالا
والرسول المصطفى عقب الظلاله
والجهل ولى وعصر الشرك زالا
بالملوك اللي تحكمه بالعداله
من على عبدالعزيز ولاتزالا
من جنوب وشرق والغرب وشماله
الأمن موجود والخير ايتوالا
كل شيء فيه يبهر في جماله
درة بعيون سكانه تلالا
وحده من وحد المولى لحاله
ما غزاه بجيش ظالم واحتلالا
بالعقيدة والصناديد السلاله
اربعين ونصهم عند الحلالا
في نهار خلد الماضي رجاله
بالشجاعة كل ما جاله مجالا
استرد الملك فيه وطاب فاله
مع زغاريد الفرح صوت ابتهالا
يا عسى ربه يظله في ظلاله
في نعيم لا حساب ولا سؤالا
والختم صلو على المعصوم واله
عد ما ينشى من القبله خيالا
