قالوا تحب وقلت بالحب تعذيب
كم جمرة بالقلب موقد لهبها
كم واحد أضحى قتيل المهاديب
العين تذبح والبلا من هدبها
وكم نظرة سوت بأهلها الأعاجيب
عقب الهنا تشكي مساوي تعبها
لا صرت ما تعرف اسلوم الرعابيب
جنب عن ادروب عسير نشبها
لو أبدعن بالقول مالك مقاضيب
تفنى حياتك ساعي في عطبها
وتروح بالتفكير سجات وتغيب
ويذوب قلبك ما تحمل غضبها
وتبقى رهين لشارته والمطاليب
لو يطلبك هالروح ترخص طلبها
ولا تهتني بالنوم غفوات ما يطيب
وكل الهموم لساحتك تنتدبها
درب الهوى كله متاهات وصعيب
يشقى به اللي خطوته ما حسبها
اسأل وتلقى بالقصص والتجاريب
تغنيك عن دنيا الغرام وعجبها
ولا شك بعض الحب للنفس تهذيب
تبذل سخى والروح نالت أدبها
هذي حياة الحب رغبة وترهيب
كسبان ياللي سالي ما قربها
