خلاص الله يحرسك يا بعد من يلبسٍ الشال

وريح نفسي اللي كم سنة وانته معنيها

ترى بعض التصرف يا حياتي يجرح الرجال

وترى بعض الكحل للعين يجرحها ويعميها

وترى بعض الغلا لا زاد عن حده يصير اهبال

يهين النفس والعزه من القمه يوطيها

أنا احبك وأنا حبك وحبي لك ما فيه اجدال

وحبك خطوةٍ كتبت عليه لازم امشيها

ولا اسمع فيك قال وقيك والا قيل والا قال

هروج الناس في عشرتك والله ماستمع فيها

وابي منك الوفا بالعهد ياغلا من خطر بالبال

وفاء تهديه عينٍ غاليه لعيون مغليها

ولك مني وفاء بين العرب تضرب به الأمثال

وفاء يقنع طموحاتك ورغباتك يرضيها

إن كان انك تبيني مع بعض نصير عال العال

تعال أخذ المحبة والغنى مني وعطنيها

نبي نبدا محبتنا بفال مقتفيه عقال

نحقق للنفوس من الغلى لو ربع أمانيها

لا تسمع كلمة اعدانا لا تسمع كلمة العذال

تضيع وهم على ما قيل حاميها حراميها

نصيحة لا تسمع بالحسود وتسمع الدجال

وتهدم كل امانٍ كنت في رجواك بانيها

ما ابيك تصير معيه يا حبيبي بين حال وحال

ابيك تصير عونٍ لي على النفس وبلاويها

يا مالي راس مالي يا بعد مالي وراس المال

متى يا روح روحي روح روحي فيك اهنيها

متى اشوفك واهني فيك عينٍ دمعها همال

عيونٍ تنتظر شوفتك يا شمعة لياليها

واهني فيك نفسٍ حبتك حبٍ على ما قال

يسم الروح سم ويدمر اولها وتاليها