يا زين والله ما نقصني بدنياي
غيرك من الحاجات بالنفس حاجه
اغليك واشوف الغلا زاد بلواي
مدري متى عقب الفراق نتواجه
عيا الزمان يحقق رضاك وارضاي
وجروح روحي شوف وجهك علاجه
شكواي لله والسبب منك شكواي
واجهت عقب الريف ذاري عجاجه
وانا الذي صوب ارضكم تمشي خطاي
وطاريك راحة خاطري وابتهاجه
نسيت الايام مضت كنت واياي
ليه الجفاء تجزى الحبيب انحراجه
هذا خطاء ياسم قلبي وسلواي
حبك على لونين سكر وزاجه
يوم تناحيني ويوم تبي راي
والحب ماهو اظهار سر ولجاجه
مبداك هذا مايوافق لمبداي
ولاني من اللي يرتضون السماجه
يا شفت من خل له اخلصت جزواي
بالصد رديت الجزاء بانزعاجه
اقفي عنه وان رحت ماعود له جاي
والنفس عزه خيرها وانفراجه
ما يتبع المقفين ياكود شنّاي
تضيق فيه فجوجها والزراجه
يشرب من الحنظل بكاسه من الشاي
لو شاف من شر الامور اعوجاجه
