يم الفهد جزلات الأشعار مهداه
ونشارك الشعار باتمام عشرين
للحاكم اللي حاشت الجود يمناه
هو شيخنا الضرغام نسل السلاطين
قاد الوطن ثم عز من لاذ بحماه
في خدمة البيتين ساق البلايين
وحصّن حدود المملكة وأرعب أعداه
والخير ساد وعم كل الميادين
شيخٍ يروم الطيب والطيب خاواه
خوّه قديمه ثابته بين الاثنين
والمجد سلم لك ذلوله ومركاه
يقول صعب يصير بالغمد سيفين
يا ابن الزعيم اللي بسيفه وشلفاه
وحّد شعوب الدار في خدمة الدين
وأتعب ظهور الخيل باقصاه وأدناه
وأرسى حدود الدولة يسار ويمين
وحنا شعوب الفهد والفهد نفداه
من عهد أبو تركي وحنا وفيين
والمملكة عدوّها نطعمه داه
وصية حنا عليها متواصين
عدوّها نكسر شباته ونطاه
من ماض الدنيا القديمة وذا الحين
