سميت بسم اللي عباده رضت به

علام ما تخفي الضماير وتنويه

الله هو البادي وروحي بدت به

الحمد له والشكر والكل يرجيه

وأسمى التهاني عذب الأشعار جت به

بحلول عيد الفطر من قلب تهديه

كل المشاعر للمليك أعلنت به

بالبيعة العظمى وعيده تهنيه

فهد جميع قلوب شعبه صفت به

له الولا من كل الأعماق تبديه

أسمى الأسامي سيدي سميت به

هو خادم البيتين والحد حاميه

هو عزوة شعوب العرب واعتزت به

في حاضره في مقبلاته وماضيه

كل الوصوف الطيبات أكملت به

طيب وكرم وأفعال تتعب أماريه

مواقفه على الشموخ أعتلت به

المجد مجده والهقاوي هقاويه

وعضيده الأيمن فعوله سمت به

عبدالله اللي يرفع الرأس طاريه

وسلطان جزلات الفعول أستوت به

سلطان خير وخيراتٍ مساعيه

حكامنا اللي كل خير سعت به

كل اهتمام وخير للشعب توليه

مبروك عيد كل نفس أسعدت به

للفهد واخوانه وشعبٍ فخر فيه

وأسمى التهاني ما بدته انتهت به

الحمد لله والمخاليق ترجيه