يا محمد فرحة العيد الجميلة
فرحة اللي حارب النفس وهواها
مايدور غير تقوى الله بديله
محتفظ بأمور دينه مانساها
صام بالشهر الفضيل وشد حيله
واتبع سنة نبيه واهتواها
واعتكف لله فالعشر الفضيلة
من بدايتها لغاية منتهاها
فرصته يتعب لها يومه وليله
في ليال ضاعف المولى جزاها
في صلاته مجتهد والله كفيله
رحمة الله كل خلقه في رجاها
وإن تصدق مايمد إلا الجزيله
مايقول اني عطيت اليا عطاها
فرحته بالعيد غايتها نبيله
فرحة العيد السعيد بمستواها
مير من يترك عمود الدين ويله
الصلاة المصطفى وصى علاها
من يصوم ولا يصلي وش حصيله
يوم تسئل كل نفس عن خطاها
لو يعيد فرحته بالعيد حيله
حيلة يبغى التستر من وراها
أخفقت في داخل المضمار خيله
ما تساعدها على الغاره ايداها
راعي التقوى تفوز به الأصيلة
السبوق اللي تفوزها خطاها
عن كثير الهرج يكفيني قليله
واختصاره قاعدة نمشي علاها
