ابا انشد الشعار واللي يحلون

يا ويش رجال على جنب عذراء

يعطيك علم داخل البنت مكنون

براسه المرسوم يا ناس يقرا

يا السايق أرفق في القيادة وبالهون

عينت في السرعة بلاوي وشرا

واسحب عيار الزيت من قبل تمشون

الزيت نقصه للمكينة مضرا

عسى السيول اللي تجي كل مطمون

يخضّر منها كل وادي وصحراء

وياللي تمشى خذ نصيحة بمليون

لازم عيار الزيت يظهر ويقرا

يا الله يا المطلوب يا خالق الكون

تغفر ذنوب العبد سر وجهرا

الحل يا كاتب لغز جاك موزون

حله عيار الزيت لا صرت تقرا

بعض العرب لاقاد يسرع ومجنون

ما شفت في السرعة علوم يسرا

افحص عيار الزيت دايم وبالهون

عيار المكينة كل فترة يجرا

يا بوسعد يا للي تبي الرد ممنون

قريت لغزك بين وشيقر وشقراء

اقول عيار الزيت لازم تشوفون

واحذر تولع لمبة الزيت حمراء

الناس قاموا للسفر يستعدون

امطار من فضل الولي وارض خضراء

وكل تفقد موتره قبل يمشون

وشافوا «عيار الزيت» للزيت قدرا

اللي يروض مهرة الشعر بالهون

ما هو مثل من يعسر القاف عسراء

واللي بخدمة حضرة البنت ممنون

اعيار زيت بالمهمات يطرا

يا اللي كتبت اللغز والحل مدفون

اعقرت حله وسط الابيات عقرا

انشد هل الالغاز واللي يحلون

حله عيار الزيت والعين تقرا

يا مرحبا واعداد خلق يصلون

واعداد ما تنور على الارض قمراء

الحل واضح ما يبي شك وظنون

حله عيار الزيت ما فيه هذراء

يا ناس انا في حل الالغاز مفتون

لكن من اللي للصحف دوم يقرا

والفضل لله جبت ذا الحل مضمون

هذا عيار الزيت في وسط مجرا

يا مرحبا من خاطر صار ممنون

ويا ناشد الشعار بالحاجة ادرا

موترك زيته عايره قدم تمشون

وتقبلوا تحية والف شكرا

بالقاف يا ناصر على الدوم مفتون

لوني وراء اليابان والا بشقراء

هذا«عيار الزيت» والناس يدرون

في وسط ظلما ما بها نور قمراء

وافقت ناس من على الجمس يمشون

في وسط ريضان زهيه وخضراء

سواقهم يمشي على الدرب بالهون

(عاير زيوته) قبل ياتيه مسراء

هذا (عيار الزيت) ياللي تعرفون

له بالمكينة ياهل العرف مجرا

يعرف عليه النقص والزود واللون

تقرير لا يكتب ولا هوب يقرا

لغز بعرف الناس وافي وموزون

لا جلب في سوق الجزيلات يشرا

ربحان شرايه.. ولا هوب مغبون

لو هو عيار نازل وسط غدرا

يا ناصر المنعور والقاف موزون

هذي حلول اللغز وانته به ادرا

نبغى غيار الزيت من دون سيفون

شفت العيار اسود ولا فيه صبرا

حليت لغزك يا ولد حل مضمون

وترا عيار الزيت مخبور خبرا

موجود في كل المواتر وموزون

هو شغلته داخل ولا هي ببرا

لا هانوا اصحاب الجزيرة ولا تهون

اللي لهم عند الرجاجيل قدرا

الزيت له مقياس صادق ومضمون

لولا عيار الزيت ما عنه يدرا

خذ الكلام اللي بلا شك وظنون

ترا النصائح يا بن الاجواد تشرا

انظر عيار الزيت لا صار مبخون

وحذراك من سلعة هل الغش حذرا

سلام ما توضي بروق من امزون

تسرى ظلام الليل والناس سدرا

ارسل جوابي ضمن منهم يحلون

افحص (عيار الزيت) صبح وعصرا

هلا هلا يا بو سعد والف مليون

تعداد من يحرم لحج وعمرا

عيار المكينة داخل الزيت مسجون

لو ما تجاوز والاشارات حمرا