أقرا الوجيه ولا تدقق بالافعال
ولا تكشف المستور تلقى الهوايل
بعض الرجال رجال بأفعالها رجال
وبعض الرجال أشباه مامن صمايل
بعض الأفعال أفعال باقفاي واقبال
وبعض الأفعال أحيان ماهي فعايل
ماكل من يركب على الخيل خيال
البعض يركب لأجل جمع الحصايل
وماكل من يركب على الهجن جمال
الفرق واضح باختلاف الوسايل
والطيب طرقاته عسيرات وطوال
ما يوصله الا عريب السلايل
اللي لهم في سكة المجد منزال
أنا أشهد انه للطويلات طايل
واليوم كل بالطويلات يختال
ما يستمع للهرج في قول قايل
كلن لبس له ثوب وشماغ وعقال
الشكل واحد مير فرق الخصايل
وكلن معه ساعه وبيجر وجوال
زودٍ عليهن كبرة النفس شايل
أقرا الوجيه ولا تدقق بالافعال
ولا تكشف المستور تلقى الهوايل
