روح حبيبي ياعسى الله يجازيك
وانا معي ربي هو اللي يعيني
لا تحسب اني في بعادك ابطريك
طويت صفحات العتب في سنيني
نسيت ايامك وباقي لياليك
نسيت مثلك.. يوم قلبك نسيني
كنت أحسبك تستاهل الحب واعطيك
اعطيك عمري.. كل شي بيديني
وكلٍ غدى مثلك وياكيف اجاريك
ما تعرف ان الحب زينٍ وشيني
كنت أحسبك شاري.. وانا مثلك اشريك
اشريك في عمري.. ودمعي.. وعيني
لكن حسايف دمعةٍ واحده فيك
وحسايف اللي راح.. بينك.. وبيني
خلاص كل شي.. انتهى كان يكفيك
وانا معي ربي هو اللي يعيني
نورة الصالح - الرياض
هفوة وعدت!!
أشوف لي من بعض من الأصحاب جفوه
جفوة غضب.. مادري.. تجافي مشاريه؟!
هفوه وعدّت بعدها ألف هفوه
ويا صعبها من شخص.. لا صرت تغليه
وحلفت انا ما بيع سري وخفوه
مهما يبان الجرح.. أخفى مواريه
ماني من اللي يكدر العج صفوه
كلٍ على ما قيل من دون عانيه
وماني من اللي بالشتاء باع دفوه
أصبر على مر الزمان وبلاويه
ومنهو جفاني.. ما ترجيت عفوه
لا والذي كل المخاليق ترجيه
ومنهو نساني.. أو تظاهر جفوه
ما هي غريبه اليوم .. ما به مشاريه
