عسى برق الجنوب يقال سال وطال ضلع طويق
وعمم ماه فوق حماه وفاضت كل شعبانه
عساه يطيب جرح الذيب من أم جنيب بالتطبيق
وعسى الأمطار تخفف ثار من به نار باشجانه
عديل الروح أنا مجروح ويكفي منكم التشويق
خطير الشوق للمعشوق أخاف يثور بركانه
أنا الجاني وسجاني منع في جوي التحليق
قفل بابه وباسبابه نسيت السعد وازمانه
وراعي الود اذا مانحد يمزق مهجته تمزيق
وهو مافيه من يشفيه غير الله سبحانه
وغاب وراح وانا بجراح حلومي صعبة التحقيق
لاصار بعيد مابه عيد وعيني منه سهرانه
وكلّمته وعلّمته على غيري أبد ما تليق
انا انسب لك ومكسب لك حذاري تغرك ألوانه
واثر مالي نصيب أصيب غير العهد والتوثيق
وهرج عذب كله كذب سراب ومات ضميانه
ألا ياقاري أبياتي أبي من حضرتك تعليق
تخفف لوعة اللي فيه هم وزادت أحزانه
