البارحه ما هملج الطَّرف بنعاس
ما فاض من نجم عيوني تخيله
لا باس يا عيني على السهر لا باس
على وليفٍ فات ما ألقى مثيله
عنَّا قطع شوف المواصل له ارماس
ولا في يدي من ناب الارداف حيله
فيما مضى ياخذ جوابي من الراس
واليوم لا عاني وانا ما اعني له
العشره اللي ما توثَّق على ساس
تطيح لو صارت حصونٍ طويله
يا ونتي منها المعاليق يباس
صبري قضا ما باقي إلا قليله
صبرت صبر صابني منه وسواس
صبر له النفس العزيزه ذليله
علي وليف حال من دونه الياس
والياس طِبّ للقلوب العليله
من يتبع المقفي مرده للافلاس
مثل الذي بالقيظ يدفق صميله
هذي دروب الحب جدد ودراس
الله يمضيها بستر وجميله
