قرائي الأعزاء أشكركم على مشاعركم التي غمرتموني بها بعد مقالتي الأولى في (شواطىء) الجزيرة وآمل منكم التواصل وإرسال رسائلكم على عنوان الجزيرة في الرياض ص. ب 354 الرمز البريدي 11411 عناية (المسفهل) أو على فاكس 4871064 ولكم خالص ودي وتقديري.
** أبدأ زاوية اليوم متوكلاً على الله وأقول ما قهرني الا ذاك (الهنيدي) اللي ما تشوف الا رأسه وهو يقود شاحنة في الدائري وحاط رجله يمشي 150 وين المرور عن هالمجنون!
آه لو أقدر الحقه كان أسفره على أول طائرة!
** لا تزعل يا خالد عبدالرحمن تراك (سنافي) ونشمي في البر بس تراني أمزح معك الأسبوع الماضي!!
** أسد علي يا بوراشد وعند (المعزبه) نعامة يا حليلك والله انكشفت أنت وعيونك الحمراء!! (ابو راشد سرى ليله وهل الدمع من عينه)!!
** يا (سمج) ها (الحريم) من تالى كل عزيمة فستان وكل عرس فستان وكل زواره فستان لا وجوال بصراحة (طفرتونا) حرام عليكم!!
** بعض الزوجات ينقهرن اذا طلعت مذيعة ولا فنانه (زينه) خاصة إذا صار رجلها بحلق بعيونه وفاتح فمه!! إحداهن غيرت القناة فغيرها زوجها..
** جارتنا أم حسين الله يجزاها خير تروح لنا كل جمعة بادية جريش وقرصان (الأولين) مهيب مثل قرصان وجريش هنود محلات (المثلوثة) الله يرحم زمان أول!!
** جعلهم (المصع) قولوا آمين هاللي حاطين الشوارع ساحات سباق يا ناس ترى المستشفيات أمتلت بالمعاقين والمقابر أمتلت بالأموات وكله بسببكم!!
** قرب الصيف وبدأ السفر بالأقساط يا زوجات تراكم بتسببون في سجن أزواجكم بالله عليكم وش أرحم (حر الرياض) ولا براد جنيف وباريس والخاتمة (السجن)!!
قالوا للشاعر (النمطي) منذ متى بدأت كتابة الشعر.. أجاب لافض قوة (منذ ومُبطى) صح لسانك يالفصيح!!
** يا كافي ذا السنة ما شفنا (الفقع) ويقولون فيه فقع مستورد!! حتى الفقع صرنا نستورده معاد بقي الا الضبان ولحم «القفر» نستوردها بعد!!
** يا حليل التكنولوجيا اللي جابت لنا (كاشف الأرقام) بصراحة ارتحنا من المعاكسات والمزعجين والمزعجات! بس باقي يحلون لنا مشكلة الكباين!!
** في الاسبوع الماضي كانت زاويتي مجاوره لموضوع الفياجرا أكيد ضمنت أن عشاق الفياجرا قروها ويا كثرهم!!
** طاح من عيني جورج قرداحي يوم حلق شاربه حتى اسئلته صارت ثقيلة دم!!
** أتحدى فيه بيت ها الأيام ما فيه مدرسة او مدرس خصوصي واذا عرف السبب بطل العجب!!
** ايمن زيدان ضيع مشيته ومشية الحمامة ضيع نورمان أسعد (المملوحة) وضيع التمثيل وكله من أجل الذهب!! أنا أشهد انك خبل ومفرط أحد عنده مثل نورمان ويطلقها؟!
| 
