غربة أوطان ومسافه والنهاية لا نهايه
انتهى في نفس دربي والمواجع سرمديه
ضايع كني بلا وجهه ولا مقصد وغايه
غربة ماتنوصف بالحروف الابجدية
المواجع قيدتني كيف تطلق لي يدايه
اشهد ان كفوف وقتي في مواجعها سخيه
والهنوف اللي حلاها صار بين الناس آيه
ماكفاها قلبي اللي سقته بكفي هديه
اسهر بليلي وهي تختال قدام المرايه
كنها تشرح لها اسرار فن الجاذبيه
كل ماقرّبت منها زادت بقلبي عنايه
لعنبو حبٍ يوردني على حوض المنيه
غلطتي كانت جنوني يوم اعلمها الرمايه
والنتيجه واضحه طبعاً انا صرت الضحيه
كنها صارت على قلبي لها حق الوصايه
تستلذ الطعن في قلبي بلا ذنب وخطيه
كثر ما زادت عذابي كثر ماتظهر غلايه
وعزتي للي رماه الوقت في يدين حضريه
لو بحاول واختصر في قصتي واصل الحكايه
بدوي من سوء حظه حب بنتٍ عنهجيه
النهايات البعيده صارت بعيني بدايه
رحلةٍ فيها تجرد خافقي قدم البريه
مغترب مع هم قلبي والنهايه لا نهايه
والمواجع حسبي الله كلبوها سرمديه
