خذت كل الزين والملح ما فيها جدال
خذت من وصف الظبا شكلها واجفالها
لا نظرت عيونك السود جا في اختلال
والقصايد مع حضورك يجي مرسالها
ياحبيب شاقني من قديمات الليال
صورتك قدام عيني طوال اليالها
أنت شفي وانت حبي حقيقة لا خيال
لك محبة بالحشا يا كبر منزالها
وحب غيرك في ضميري ترى ما له مجال
كلمة يا صاحبي ما كذب من قالها
من يشوفك ما يطالع يمين ولا شمال
كيف باللي عشرتك شارب فنجالها
صادقٍ لك بالمشاعر ولا تبغى سؤال
وكل نفسٍ عاشقة تنعرف من حالها
ما أستطيع أنساك ياصاحبي هذا محال
كود تنسى الناس هذا الزمان عيالها
كل ما أملك مرخصه من فلوس ومن حلال
اطلب الجزلة وأنا أعطيك عشر أمثالها
بس ترحم عاشق منك خطرٍ بالهبال
من جنون الحب نفسه قريب اهبالها
ما نبيها منك قطع المودة والوصال
ياحبيبي لي رجا لا تقص حبالها
