العيون السود منها صابني رمح المطني
استحلن عرش قلبي واودعن الجسم بالي
يوم لديت النظر صوب النواعس واذهلني
لا قدرت انطق جواب ولا قدرت القي سؤالي
آه لو ان النواعس للمولع يرحمني
يارد العطشان ويصدر من الجم الزلالي
وذي عوايد من رماه الحظ يرجع للتمني
والتمني ساسها مبني على جرف هيالي
يا كحيل الطرف ياغض بعد شوفتك كني
من ذهولي دارج عقلي على حد الهبالي
بالتغلي والتدلل ما احد غيرك فتني
لابس تاج الجمال وزاهي فن الدلالي
لو بنات الفكر شرّد لاجل عينك طاوعني
مار وشلون اوصفك واوصافك تفوق الخيالي
القصائد بالمكايد والشدايد يتبعني
كل ما هاضت شجوني جاتلي في شف بالي
وانت شعري فيك من دمي وحبك ممتحني
والغلا ذباح للارواح مار ارفق بحالي
يا مناتي يا غناتي وانت ذوقي وانت فني
انت كيف الراس بين الناس الاقصى والموالي
ساع شفتك ضعت في دلك وضاع العقل مني
الله اكبر يالله استرضعت ما ادري وش جرالي
قبل اشوفه والله اني عشت طيب ومتهني
وبعد عرفه بان صرفه وقتي القاسي ومالي
بس اهوجس بعدما شفته وافكر به واغني
لو يغيب اتذكره واتخيله كنه قبالي
والنتيجة صار شر الزين لي والخير عني
والخطر قدام مخفيته لنا سود الليالي
