جار الزمان وشب فالقلب لا هوب
وشمس السعادة حوّلت للمغيبي
وجوي تكدر وأصبح الوضع مقلوب
كنت الطبيب وصرت أدوّر طبيبي
أوّل لبعض الناس غالي ومحبوب
واليوم ذاك البعض قد هو حريبي
وأنا ما أحسب برأي جربا ومجروب
رخوم قوماً في قفاي إتحكي بي
ما همني نذلٍ يدوّر بي إعيوب
وهو عيوبه عد رمل الكثيبي
يا قلب لا تحزن وما صار مكتوب
هذا قدر عمري وهذا نصيبي
ماب الحزن والدمع لوهلّ مسكوب
يقدر يعوّض ما فقدت ويجيبي
ماردّ يوسف دمعة إعيون يعقوب
ماردّه الا من قضى أنه يغيبي
ربّ كريمٍ فارجٍ كل مكروب
إبقدرته وحده يحلّ الصعيبي
يا قلبي إصبر وإحتسب وأعلن التوب
وش عاد يعني لأمتلى الراس شيبي
إن كان حلمك مات وأمسيت منكوب
هذا طموحي ماله ألا يطيبي
باكر تعدل وإيحصل كل مرغوب
مانيب من يشرب إحثال وسريبي
أرجي عسى اللي صار كفارة اذنوب
ورزقي على اللي فوق خلقه رقيبي
