قم يا فهيد وشب نار كبيره
واصرم عليها من الحطب لين تعتز
نار لها مع طلعة الشمس نيره
ليشافها العمسان عقب العمس فز
وهات الدلال وحطهن بالحظيره
واجذب لها جمر الغضا واترك القز
حتى الى جونا الوجيه السفيره
على تنابيل يكزونها كز
يلقون فنجال شرابه بريره
يطرب لها العمسان ليمزها مز
ومن عقبها كبش شحومه كثيره
الى جت مواجيبه يقلط على رز
في روضة عقب المطر مستديره
من سيلها تلقى بجيلانها حز
ليهب ذعذاع النسيم بغديره
تلقى بها الغرنوق والبط والوز
وش خانة الدنيا الختول الغريره
ليما ادرك الرجال بأطرافها عز
نفرح بها نبي الشرف والستيره
وعن حاجة تحوج لمن لا يميز
تمسي بها وامن وتصبح مغيره
ولا بد من صدفاتها لو تحرز
خاب وخسر من حطها له ذخيره
والموت راياته على الناس تهتز
لا بد من قبر هيام حفيره
فوقه طويلات النصايب تركز
