يالله يا جابر عظامٍ كسيره
تجبر عزا سلمان واخوان سلمان
أهل الفخر حكام شبه الجزيرة
اللي لهم فالوقت هيبه وسلطان
بأحمد.. ولد سلمان مروي الشطيره
أمير نجد اللي له الطيب عنوان
درع الرياض.. وتاج فخره وأميره
راعي المواقف والفخر طير حوران
وترحم فقيدٍ راح مع درب غيره
قفت بهم دنيا الفنا.. مالها أمان
دنيا خلقها الله رحى مستديره
تدرج رحاها فوق شيب وشبّان
وحكم القدر مقبول شره وخيره
والصبر في الازمات من قوّ الإيمان
والموت حق.. وحكمة الله كبيره
ولا دايم الا وجه خلاق الانسان
الوذ به واستلطفه واستجيره
ينجي الفقيد برحمته عالي الشان
يارب عن نارك بلطفك تجيره
وتغفر ذنوبه يوم زوغات الاذهان
في ساعةٍ كل يقرَّر مصيره
للشر ميزانٍ.. وللخير ميزان
وتحصى الذنوب صغارها والكبيره
وتطوى الصحايف بين داين وديّان
جعله بصحبة طاهرين السريره
أهل التقى.. وأهل النقا.. وأهل الاحسان
ويا عالمٍ ورد الزمان وصديره
إجبر عزا عز المواطن والأوطان
