يا هاجسي جدلي من الشعر تذكار
ما ينّسى من كان بالخير مذكور
مرحوم يا أمير الوفا نسل الأحرار
تاريخ مجدك ما نوفيه بسطور
لو تنفدي الأعمار من بعض الأعمار
أصبح علينا الأمر هين ومقدور
رحنا فدى عمرك من كبار واصغار
والله يا بو فيصل على غير مخسور
يا فزعة المظلوم لا جاك محتار
لا جاك متضايق يجي منك مسرور
يامزبن اللي يشتكي ضيم الاقدار
مدة يمينك خلت الحال ميسور
شهمٍ كريمٍ وافيٍ كل الأشبار
ما يلحقك فا الطيب شكٍ ولا قصور
يا فارس الاعلام في كل الأقطار
مثلت فيه من البطولات لك دور
لك في مجال الخيل جولات وأخبار
رفعت راية عزها سنين واشهور
حزت المراجل كلها يمين ويسار
الطيب لو له تاج ما معك مخشور
مرحوم يا أميرٍ معاريفك اكثار
رمز الشرف با العطف واللطف مغمور
ما اكبر فجيعتنا بعد صار ما صار
الله من قلبٍ بما صار مقهور
انت العوض يا بو فهد عز ووقار
يا سيدي سلمان من قلب وشعور
وانت السند لي بعد من ودع الدار
عسى عزانا فيه يا أمير مجبور
يابو فهد ما مات من جاله اذكار
فالذاكره عايش ولو كان مقبور
يا الله طلبتك يا منجي من النار
يا غافر ذنوب الملا لو هي بحور
يا الله عسى مثواه من بين الأبرار
في جنة الفردوس من حوله الحور
وصلاة ربي عد زخات الأمطار
على نبيٍ بدل الجهل با النور
