هزتني الدمعة على خد سلمان
وكتبت من صادق شعوري قصيده
وش لون ما أتأثّر على طير حوران
وانا اتمعّن صورته في الجريده
ما ابكاه مبكينا وحزنه لنا أحزان
في دبرة اللي ما يضيع عبيده
من لامني في شيخ أهل نجد غلطان
شيخ الشيوخ اللي صفاته حميده
مرحوم ياشيخٍ لبس بيض الاكفان
عساه بالجنة وروحه شهيده
نخلص له الدعوات من قلب ولسان
حيثه رجل مبدا ودين وعقيده
على النعش شالوه يوم القدر حان
فقيدةٍ ياكبرها من فقيده
عبدالعزيز بجانب اخوه سلطان
كلٍ مسك جال النعش مع عضيده
أحمد أخونا كلنا لأحمد اخوان
وسلمان أبونا كلنا له بديده
أحمد شجاع وله مع الخيل ميدان
سطر له التاريخ صفحة مجيده
يشهد على فعله رجالٍ لهم شان
في مجتمعنا له فعولٍ عديده
في قلبه الرحمة وفي فعله انسان
والطيب فنٍ من فنونه يجيده
