مبطي عن الشعر لاجيته ولا جاني
ثلاثة اشهر وانا ما دجت باطرافه
جاني عزوف عن الطاروق وداني
في طلبة الرزق كن الشعر ما حافه
ولا نيب من يكتبه يا دان.. يا داني
ان ما كتبته مشاعر ما اقبل اسفافه
واليوم وش عاد ابرجي غيرها ثاني
صدق المشاعر.. وشوق الشعر لاسلافه
في عودة اللي اشوف الكل فرحاني
ياحظ نايف.. بحب الشعب لا شافه
لحفهم الامن وامسوا نومهم هاني
ويوم ان نايف شكا.. صاحوا لميقافه
مواقف تذهل اللي شاف باعياني
الناس جت له مهنية بمشرافه
ماجوا على شان مال.. وشرب.. وصياني
ما ساقهم غير حب صعب توصافه
وشلون ما افرح وهو بلسم للاحزاني
ياكم حزين تفرج كل ما حافه
من ضيم ولا ديون شانها شاني
ساعة لفا نايف اطلق عنه كتافه
والحمد للي يشافي كل مرضاني
الحمد له عد من هو بالحرم طافه
على شفى الغالي.. المتواضع.. الحاني
النادر اللي جميع الجود.. باعرافه
مية هلا.. فيك قيلت قاصي وداني
مية هلا.. قالها شعب بك هتافه
مية هلا.. كنها لولو.. ومرجاني
في شخصك اللي رجع ترحيب.. وضيافه
وانت المعزب وحنا كلنا اخواني
ولو يجمع الحب شابه وصفك اوصافه
مشاعري صغتها ثم حرفي اضناني
القاف.. وقف وحبك تلطم ضفافه
والعذر منك وشعري ليت ما جاني
ثلاثة اشهر.. وذي صدمته وقطافه!!
