خلاص تبت من انتظر توبة نصوح
الوقت مثل السيف في كف النحيس
مليت من حبس المشاعر والشحوح
والقيد يدمي معصم الحر الحبيس
ابا اندفع دام الأمل برقه يلوح
الموج يغري عاشق الدر النفيس
اليوم طل الحظ بالوجه الصبوح
وانا بعد كنه جذبني مغنطيس
بعض الفرص بالعمر مرة لو تتوح
ما هيب دايم كنها ليلة عريس
ليه انتظر يمكن تجي والا تروح
لا طاف يوم السبت ما طاف الخميس
سمه طمع والا بعد سمه طموح
لولا الطمع ما غرابونا آدم أبليس
كل الأمم تدري بقصة قوم نوح
اللي عبروا للي قعد حظه تعيس
عنتر عقيد القوم وحصانه جموح
لعيون عبلة يعرفه حام الوطيس
والمسالة في منتهى كل الوضوح
لا مات قيس بن الملوح عاش قيس
