الله يسلمك هالعبارة من اغرب العبارات اللي تتردد بكثرة في حوارنا مع بعض.. وعلى طاري العبارات هناك ايضا عبارة جميلة جدا من وجهة نظر شخصية وهي عبارة «عز الله مقامك»، وغرابة «الله يسلمك» تكمن في انها عبارة مناسبة كرد على اي كلام يوجه لك لما تتقابل مع واحد علاقتك فيه رسمية وتبي تنهي الحديث بسرعة، اعطيكم مثالاً بسيطا الحوار التالي بين ثنين تقابلوا صدفة:
وين الغيبات فاقدينك / الله يسلمك.. كيف الحال/ الله يسلمك.. تفضل القهوة عندنا/ الله يسلمك.. تغد عندنا باكر/ الله يسلمك.. خلنا نشوفك/ الله يسلمك.
** ظاهرة «الله يسلمك» شيء طبيعي في ظل مشاغلنا الكثيرة واهتماماتنا الكبيرة فنحن شعب دايم مشغول ودايم مستعجل، ماعندنا وقت نضيعه واول ما نتقابل كل واحد يطير بالثاني «كيف الحال وش اخبارك وشعلومك وشلون الاهل ومن يعز عليك» ونتفرق وحنا مادرينا عن اخبارنا ولا اخبار من يعز علينا وتلقاك رحت وانت ماتدري وش قال ولا وش قلت انت.
** عند الخباز او في السوق قدام المحاسب تلقا كل الربع اللي في السرا متضايقين ويتأففون ويطالعون ساعاتهم.. ويساقطون، صحيح انه من شب على شيء شاب عليه واننا تعودنا على «المساقط» من ايام مقصف المدرسة ولكن يالربع ترا مقصف المدرسة ووضعك كطالب غير سرا عند الخباز او الجوازات او المحاسب وغير وضعك لما تكون رجال كبير وابو عيال.
** في الشارع كل الربع مستعجلين ومتنرفزين، وعند الاشارات تلقا السيارات تأتي من الخلف لتتوسط التقاطع هذا اذا ما قطع اصحابها الاشارة.. الغريب انك تلقاه طالع يتمشى! وكله كوم واللي يزعجك بالبواري عند الاشارة كوم.. تلقا الواحد ماخذ وضع الاستعداد.. يده على البوري وعيونه مركزه على الاشارة مايمديها «تنوي» تصير خضرا الا هو مزعج العالم! على طاري البوري نصيحة لسكان الرياض خاصة.. لاتفكر في يوم من الايام انك تفصله من سيارتك.. لاتفهموني غلط ما اقصد انكم تبادلون من يزعجكم الازعاج ولكن اقصد انكم تنبهون بعض الناس «المتنحين» اللي ماتدري وانت ماشي في امان الله وماسك طريقك الا هو قالط عليك بدون احم ولا دستور.. صدقوني انفصل البوري عندي ومن بعدها صرت ارجع من اي مشوار وكأني توني نازل من «قطار الموت».
** لما تجي في الدايري الشرقي تلقا نص اللي فيه يمشون بسرعة مليون ويتجاوزونك من ورا خط الثمانطعش.. اقصد من ورا الخط الاصفر سواء اللي يمين او اللي يسار.. هذا غير اللي «يبتونون» وهذه الكلمة تستخدم في الكويت وهي مشتقة من كلمة بمعنى «بين» ويقصد بها الناس اللي ما يمشون بخط مستقيم ولكن تلقاهم يسبحون في الشارع من اليمين الى اليسار ومن اليسار الى اليمين بحثا عن منفذ وكل هذا وهو يمشي بسرعة هائلة يعني مثل ما نقول «يزورقون» وفي رايي ان «يزورقون» افضل من «يبتونون» اولا لانها اسهل وثانيا لانها مشتقة من كلمة «زورق» وهي كلمة عربية فصيحة.. وان جيتوا للحق كلهن مالهن داعي ودك الواحد يمسك خطه لا «يبتون» ولا «يزورق»!
** كم من الحوادث حصلت بسبب «الزورقة»؟ واللي يرفع ضغطك قبل لايرفع ضغط صاحب السيارة ان الشخص اللي صدم بسبب سرعته ورعونته و«زورقته» تلقاه هو الآخر طالع يتمشى!
** قارئي العزيز.. ادري اني «بتونت» او «زورقت» فيك ولكن اعذرني.. انا مواطن سعودي دايم مشغول.. دايم مستعجل.. دايم ماعندي وقت.. عذرتني؟.. «الله يسلمك»
| 
