يا قصيدي شد حيلك ليا جالك مجال
لا يهمك ضايعٍ ضاع ما دل سنعه
بالشدايد ما تكيد الرجال إلا الرجال
وأنت عزمك خابره حيد محداً يهزعه
والهواء ما حركت صلفها روس الجبال
كل ضلع يلوفه الريح وهو بموقعه
وأنت منته يا قصيدي على جرفٍ هيال
موقعك جور الدهر مستحيل يزعزعه
تنفعل لا جاء المزاحم ووقت الانفعال
والله اني فيك أقابل وراسي ترفعه
لك قبال يطلق الوجه حي أبو القبال
كل بيت منك في قلب غيرك تزرعه
واثقاً بك ممن بالولي منشى الخيال
ومن يكون مع الله بصدق كان الله معه
واردٍ صافي المشاريب من جم الزلال
ومنبعك من طيب طيب نفسه منبعه
راسي ما هزه الهرج وعلومٍ تقال
والحقود اللي هرج خل هرجه ينفعه
وكل عاقل يدخل الواقعي قبل الخيال
ما تغره خطوته لأي درب تدفعه
لو مسيره صعب والدرب في ممشاه طال
الأمل في نهاية الأمر لازم يقنعه
وأنت طيبك طاب لي طيب وافين الخصال
يوم بعض الناس يعمي عيونه بصبعه
والحقيقه حق والحق في وقته يقال
لك مدى يحري وياصل ولا حد يمنعه
استلذ بمفرداتك حكيمات المقال
ادفع المقهور للضيق واطلع للسعه
