كل ما بالكون عده للزوالي
غير وجه الله تعالى ما يزول
تجري الايام وتمر الليالي
والسنين اتمر حولٍ بعد حول
العمر ينقص ويفنى لا محالي
لا تعاقب فيه دورات الفصول
والدهر مرات مر ومَر حالي
لو صفى لا يخدعك طبعه ميول
القدر محتوم يفتك ما يبالي
والمنايا بين خلق الله تجول
يا ابن آدم في حياتك ما انت سالي
لو وصلت اعلى درجات الوصول
كيف تنسى منزلك قبرٍ هيالي
حفرةٍ ظلما مناظرها تهول
لا نزلت القاع من عقب المعالي
وصارت الكثبان من دونك تحول
ما معك مخلوق تنزل فيه خالي
مالك الا ما فعلته من فعول
ويوم بعث الخلق بالمحشر قبالي
مهطعينٍ مقنعين ابلا عقول
يوم حر الشمس فيه يزيد صالي
والعرق يجري كما جري السيول
ينظرون العلم ويش يصير تالي
مرخيين الروس بأشد الذهول
والصحايف باليمين وبالشمالي
نازله بيدين راعيها نزول
والصراط امتد من جالٍ لجالي
فوق جهنم يمره كل زول
ذا يمره مثل برقٍ في خيالي
وذا يطيح وذا يقوم وذا عجول
منهم اللي مسكنه بجنان عالي
ومنهم اللي بأسفل النار محبول
خالدين مخلدين بكل حالي
التقي مرتاح والعاصي ملول
ذي حقيقة واقعة ماهي خيالي
قلتها واللي عرف مثلي يقول
كم جمعت وكم تركت وكم غدالي
في حياتي يوم اجول بها واصول
يالله المعبود يارب الجلالي
اغفر الزلات عن عبدٍ زلول
