الصيف زلّ.. وبرّدن الليالي
والليل طال..وغابت الشمس بخيال
وهبت ذعاذيع النسيم متوالي
وقام البراد بتالي الليل يختال
والوسم جاله بالمجالس مجالي
يا كن رجالن يمده لرجال
والجو زان، وعمه الاعتدالي
وسبحان من بيده تصاريف الأحوال
متى على الله، يستحيل الشمالي
وتبدا بروقه بالدجا،تشعل اشعال
الى سرت فيه المزون الثقالي
كن الثعول إلى ضوى البرق، شلال
عساه لا ركب حقوق الخيالي
يمطر على دارٍ للأجواد مدهال
يسقي حزوم بلادنا،والتلالي
ووادي الرمه سيله من الجال للجال
يشمل جميع المملكة، بالكمالي
بجاه من يرجى لتحقيق الآمال
وعسى الحيا دايم عليك متوالي
يالديره اللي تستحقين الاجلال
الديرة اللي له ملاحم طوالي
يشهد لها التاريخ من ماضي الأجيال
دار الملوك اللي ذراهم ظلالي
آل السعود اللي لهم مجد وأفضال
حكامنا، أهل الكرم والمعالي
أهل الأيادي البيض بالجاه والمال
اعطاهم التاريخ باول وتالي
احلا عبارات الثناء، قول وافعال
منا الوفا الصادق لهم،ما نبالي
عهد علينا والوفا شيمة رجال
ويا الله ياللي بالسموات عالي
يا منزلن آيات عم والأنفال
احفظ بلدنا يا عزيز الجلالي
واسبغ علينا انعامك الوان واشكال
هي دارنا اللي ما نبي له بدالي
وما نرتضي دونه بها الكون منزال
نحبها حب يفوق الخيالي
وندعي لها بالخير والخير باقبال
