* فهد الغريري:
هذا حوار متخيل (وليس بعيد عن الواقع) بين كاتب هلالي وثان نصراوي:
الهلالي: أهم شيء مصلحة الأخضر.. إذا لعب الأخضر تنتفي الميول.
النصراوي: فعلا.. كلامك صحيح.. أهم شيء مصلحة المنتخب.. يمثلنا كلنا.
الهلالي: اعذرني لكن هذا الفرق بيننا وبينكم.. حنا يمثلنا في المنتخب ثمانية.. وأنتم.. «اللهم لا شماتة».
النصراوي: هذا اللي دمرنا يمثلنا منكم ثمانية وننهزم بثمانية.
الهلالي: بلانا والله من المدرب بس ما عليه شرهه نصراوي.
النصراوي: ولعيبتكم هلاليين ما عليهم شرهه كنهم دعاية كلوركس في الملعب لا يهشون ولا ينشون.
الهلالي: سامي شايل المنتخب شيل في هالبطولة والتمياط والشلهوب بدعوا الله لا يخليكم من الزعيم ولعيبته.
النصراوي: الجابر ما بقا شوي الا يصير مدافع مع الفرق الثانية والشلهوب علموه آخر المباراة إنها كرة قدم حقيقية ولا كان يحسبها بلايستيشن.
الهلالي: إلا سامي لا تقول فيه شي.. حضوره بس يخلي اللاعبين يثقون بأنفسهم.
النصراوي: يا رجال ادعوا بسلامة الرائد اللي خلوه يجيب أهداف وإلا ترا عدد أهداف النعيمة في باب المنتخب أكثر من عدد أهداف سامي.
الهلالي: من زينكم أنت وماجدكم تراه منول يسجل الأهداف مهوب فن بس انه كان (يوزي) الكورة في (كشته) وما يدرون وينها وإذا قرب عند الباب طمر وجابها في المرمى كنه طاقها بالراس.
النصراوي: سميتوا ساميكم أبو عبدالله ولبستوه وحطيتوه راس حربة وكابتن وإلى الآن ما وصل لعدد أهداف ماجد اللي سجلها وهو يلعب بشماغه بس.
هلالي: قاهرهم سامي شف العالم اللي تفهم كورة في بريطانيا جابوه يحترف عندهم.
النصراوي: تراهم يوم شافوا ركضه خلوه يجيب كور في ملعب الملز حقهم.
الهلالي: من يوم تشوف إدارتكم نغسل أيدينا منكم ومن لاعبينكم.. على فكرة ما يضيق صدرك إذا ذكرت انك نصراوي؟
النصراوي: لا بالعكس أفخر انه رغم ظلم التحكيم لنا إلا اننا نحقق بطولات وننافس وما يطلعنا الا معجب وطقته والا رشاوي بلقولة أجل ذيك السنة ممشينه في فياغرا ويشتري اللي يبي! لو تعطونه (وانيت أبو حنايا) غش معكم.
الهلالي: ياخي انتم الى الحين ما سكين هالأسطوانة؟؟ لا المحليين عاجبينكم ولا العالميين! الظاهر ما يعجبكم الا العمر والنفيسة.. يعني يا تفوزون يا تخربون؟؟
النصراوي: النفيسة هلالي بس انه حكم صح مهوب زي العقيلي اللي مستقعد للنصر.
الهلالي: أصلا مدري ليش أناقشك.. شف بطولاتنا وشف بطولاتكم داري اننا مقدمين طلب نبي نستأجر ناديكم ونخليه مخزن للكؤوس اللي ناخذها لانها ما عاد لها مكان عندنا.
النصراوي: نسيت ان أهل الملز مشتكين ماجد يقولون انه كشف بيوتهم يوم يرتقي فوق النعيمة والبيشي ويجيب فيكم هدف.
يسخن النقاش شوي:
النصراوي: بطولات الغفلة؟ البطولات غير الشرعية.. تحكيم.. ظلم.. ما عمركم فزتوا بمجهودكم.. أصلا وش ترجي من بطل الشوكلاته.
الهلالي: أصلكم امعات ما قاله رئيسكم قلتوه.. خمسة وثلاثين بطولة كلها أي كلام! عالمي وهو ما عندك أحد! نصدقكم والا نصدق الارقام.
النصراوي: الأرقام تقول ان النصر أكثر فريق طلع نجوم وهو الفريق اللي أخذ بطولات هامة مهوب بطولات الخطوط وطقته حنا منتخب حقيقي.
الهلالي: أجل يوم تنهزمون من نيسان بالخمسة على بالكم المنتخب؟ انتم منتخب حواري مدري وش يبي.
النصراوي: النصر بالدمام والهلال بال«...».
الهلالي: ميرندا ميرندا كل النصر «...».
ملاحطة (بالطاء):
لاحظوا اني قلت (كتّاب) ولم أقل (مشجعين)!
| 
