ياالله ياللي تنقص العمر وتزيد
يا مجزي توبة عبيده بغفران
يامن بحكمك تفني الخلق وتعيد
تغني متى ما شئت وإن شئت حرمان
يا مشرف اللي خلد الحق تخليد
وعز البشر بالدين من طين الأوثان
إنك تباعدني عن الزيف والحيد
وتجعل لغاية عبدك الصدق نيشان
والشعر لو كثرت عليه الحواصيد
للغث ميدان وللجزل ميدان
يا الله بوصف يجسد العشق تجسيد
للطيب.. ما هو عشق خدرات الأعيان
عاداته أصدق من يصون المواعيد
لكن يخون بصاحبه بعض الأحيان
لا قيل باللي يشرفونه.. وتحديد
لا عطره طيب أبيض الوجه سلمان
يذكر.. وتذكر سيرة الهجن والبيد
والصيت وعلوم المغازي والأظعان
والعزم ورجال الثنا والصناديد
والجزم والراية وذربين الايمان
والطيب وعلوم القرانيس والصيد
وأهل الحميا وعلم طوعات الأرسان
والشاذلية والعطا والبواريد
وخطلان الأيدي وعزة الجاه والشان
والشلف والفزعة وعذب المواريد
والخير جله والهقاوي والإحسان
أبوفهد لا استفحل الضيم والكيد
عز الدخيل ليا انتخابه: كحيلان
ملاذ من جفنه غشاه التساهيد
ستر العزيز اللي من العز عريان
سيف مجرب ما لحقه المناقيد
شيمة معزي لاعتلى الخيل دخان
هقوات حرٍ مهد الصعب تمهيد
حرٍ غدا لكتاب الأمجاد عنوان
سطوة رجالٍ بالملاقى لواهيد
للضد.. شجعانٍ من ظهور شجعان
صنديد من صنديد من راس صنديد
زبن المجنى الصيرمي طير حوران
يذكر.. ويذكر كيف فعل الأواليد
لا استقبلوا ريح المنايا بالأكفان
ما كل من ينوي يطول المقاصيد
للصعب وراده وللخيل فرسان
والمرجلة ما تنهقا بالرعاديد
بآيات ربي مالها غير سلمان
