انعاك يا سلطان والكل ينعاك
اللي قريبٍ منك واللي بعيدي
يا شيخنا الي روّحن بك مطاياك
للواحد اللي كلنا له عبيدي
عسى جنان الخلد يا شيخ مثواك
وفي جنة الفردوس تنعم سعيدي
وتجزي على الحسنى وتدمح خطاياك
ويرفع مقامك مع مقام الشهيدي
يا صعب والله يا أبيض الوجه فرقاك
يا حصننا اللي فالمواقف عتيدي
ماضيك مع حاضرك من طيب مجناك
دايم تحب الجزل خصم الزهيدي
لين إن روحك روّحت يم مولاك
وكتابك أبيض من بياض الجليدي
يا طيب فعلٍ لك ويا طيب يمناك
وعن موطن الزله مكانك بعيدي
دايم على الجودا مسيرك وممشاك
وفي عز ربعك صاملٍ ما تحيدي
ليا كبرت القالات يا شيخ نلقاك
ولا كثرت الأريا برايك تفيدي
كم واحدٍ عند الصعيبات ينخاك
لاقمت له جت له على ما يريدي
تواضعك في عز وتعز من جاك
ومحبتك فالدم مجرى الوريدي
من معدن الجوهر من أدناك لأقصاك
كبير ربعك شيخهم والعقيدي
يرحمك رحمن السماء ويتولاك
بالعفو والرضوان يوم الوعيدي
والموت حق وكلنّا بنتقفاك
اللي كبير السن واللي وليدي
وألا ترانا بغالي الروح نفداك
ونمد الك بالعمر عمرٍ مديدي
وحنا عزانا فيك من يتبع خطاك
حرارك اللي للسمينه تصيدي
وعسى الدعا مقبول والحور ملفاك
آمين ياربٍ كريمٍ مجيدي
آمين ثم تاخذ كتباك بيمناك
والموقف أعظم من معاني قصيدي
وصلاة ربي عد دورات الأفلاك
على النبي الهاشمي واستزيدي
