الدايم الله راعي المن والجود
سبحانه المعطي وحنا رعاياه
من عقبها يا لاحقٍ كل مطرود
ان طعتني لا تلحق مقيط ورشاه
رزق العرب في دفتر الغيب موجود
واللي كتبه الله يا العبد تلقاه
وان شفت نفسك للمخاليق محدود
دوّر على اللي تكسب الطيب يمناه
دوّر على اللي ما وطا كل منقود
وما هوب عيبٍ لا تضايقت تنصاه
وبيض الليالي خلها ذخر للسود
كم ضحك الجاهل زمانه وبكاه
وكم واحدٍ عند اكثر الناس محسود
ما يشكر النعمة على كل ما جاه
يحسب زمانه دايم سهود ومهود
ضيّع طريق الحق واختل ممشاه
ما شاف كم عدٍ من الخلق مورود
دار الزمان وما بقا شي من ماه
وما شاف كم شيخٍ من الناس معدود
ما عاد باقي غير ذكره وطرياه
هذي نصيحة قلتها حب ياكود
تثمر بقلبٍ صادق الشعر يقراه
