يقول من غنى وهو فوق الأمزان
مبعدته اللي في سماها تعلت
هيض وصاغ القول من قلب ولسان
يوم استدارت فالفضاء واستقلت
الله من قلب تلاوفه الأحزان
شبت بوارقها وبالصدر حلت
كنه من الأسقام يرجفه بركان
من حرْ ما به دمعة العين هلت
وهاذي سبايب من غرابيل الأزمان
جارت علي وطولت ما تجلت
من ظلمها قررت وأعلنت بإعلان
النفس عن دنيا الغرابيل ملت
دنياً بها الرابح يجي يوم خسران
لو أستوت له عن طريقه تخلت
ومن عاش مات وحط في بيض الأكفان
ودنياه عقب العز قفت وولت
هذا وأنا مثبت كلامي ببرهان
وخير الكلام اللي مباديه دلت
ولاني على الدنيا حريص وندمان
راضي بحكم اللي له النفس ذلت
