يا ليل انا ذقت العنا والغرابيل
من عقب فرقا الزين ضاق الفضا بي
ضاق الفضا عقب الصفا والتعاليل
شفت النوى عقب الهوى والتصابي
لولا السهر في صحبة البن والهيل
انا أشهد اني كان فاقد صوابي
ولولا القمر والنار والثالث سهيل
لكان شبت ونوني في شبابي
شوف الدلال وشبت النار بالليل
ونوض القمر ساطع يشق السحابي
في راس طعس مهايله قوة السيل
تشفي عليلٍ يشتكي من عذابي
يا ليل انا عيني تهل الهماليل
تبغي تشوف العين زين الجنابي
يا زين شوفه ماشيٍ في المداهيل
كنه غزالٍ تايهٍ في المرابي
الله يجيبه في الليالي المقابيل
ويطيب قلبٍ باين به صوابي
