لو قلت عنكم ليتني ما تغربت
ما عاد تنفع صار ما صار يا زين
كنت أحسب الغيبة من السبت للسبت
وان طولت بالحيل بالحيل شهرين
ما كان في بالي ليا من تغيبت
عن داركم بيصير ما صار هالحين
الحاصل أني من عنا الوقت شيبت
هموم قلبي تسرح يسار ويمين
كل ما طمع أني منك يالترف قربت
يطري علي البعد ما بيننا البين
وأقوم اسج الرجل من خبت في خبت
أدلّه الخاطر عسى ربي يعين
عن ما يدور بخاطري لجلك أعربت
أرجوك قدّر موقفي يا ريش العين
وجِّهت يمّك وأكثر الناس جنبت
وأظهرت لك حبٍ بقلبي له سنين
حبك زرع بي مثل ما يزرع النبت
وسط الحشا سوى زهور وبساتين
عرفت شطحات الهوى يوم جربت
الله يلوم اللي يلوم المحبين
