جعل السحاب اللي مقاديمه بروق
يمطر على نجد وعموم الجزيرة
يمطر على دار المطاليق من فوق
وبل من الوسمي سيوله غزيرة
وتنبت نفود العرق والخافق يتوق
لشوف البراري والغيوم المطيرة
ياما حلا في كل ريح وزملوق
العشب الاخضر والزهور النظيرة
وياما حلا الفنجال في حزة شروق
وجمر الغضى حوله دلال كثيرة
ويا ما حلا يا اهل الوفا شوفة النوق
بين الزهر حيرانها مستديرة
والسيل يجري بين سابق ومسبوق
ياما حلا شوفه وما ازين مسيرة
وطير السعد غنى على كل طاروق
يجذب خفوق اهل الوجيه السفيرة
وصوت ام سالم تجذب الصوت وتسوق
اعذب لحون العشق في كل ديرة
العشق يبقى بين عاشق ومعشوق
عيني لشوف البرشنقه واسيرة
فكر المولع ينتشي حيل ويروق
هجوس صقار تفاخر بطيره
ذيك الديار اللي بها الزين والذوق
باشعاري وعذب القصايد جديرة
قلبي شفوق وله ملازيم وحقوق
حق على ان اطربه واستشيره
هذا مناي وكل نفس لها شوق
يا الله عسى في الامر خير وخيرة
جعل السحاب اللي رقا بالسما فوق
يسقي ديار اهل الوجيه السفيرة
