العقول السليمة والقلوب النظاف
منبع للعلوم اللي على مستوى
تحتميها الدلايل والسيوف الرهاف
ما تغير الى ذعذع نسيم الهوى
كم نفس تورى كم نفسٍ تعاف
وكم ذيبٍ على راس الطويله عوى
المثل قال لا تسرق ونم لا تخاف
وسط بيت المعزه لو تبات القوى
قلة السيل تحدث بالديار الجفاف
والدهر لو يطوّل غار عد الروى
يخزن البر الأحمر للسنين العجاف
كل داءٍ يقول المصطفى له دوى
السعي مابها شكات عقب الطواف
ما رما كل من يسرح الى أمسى ضوى
من خلال التجارب ينتج الاكتشاف
والله اعلم بنية كل حي نوى
من يقول ان ما بين الرجال اختلاف
قلت له عن كثير الهرج مالك لوى
الاوادم تخالف والحقايق تشاف
شوف اصابع يدك خمسه ولا هن سوى
